Polos anos 70 e ante a decadencia da requinta, montaron un "grupo de guitarras" con laúdes, mandolinas e bandurrias para ir de cantarelas no Nadal e animar outras funcións. Pepe expresouno dicindo "despois veu o gholpe da cuerda", xa que esa fora a moda durante eses anos.

Os músicos eran practicamente os mesmos que antes ían de cantarelas cos instrumentos tradicionais, e unha vez que se fixeron con instrumentos, Luís de Castelao, José de Pereiro e Bascoi tocaban o laude, Benigno tocaba a bandurria e Pepe a mandolina.

José da Cordeira era o encargado de ensaialos na súa casa ou na de Zas pero, "cando veu a luz eléctrica e chegou a radio estas cousas foron perdéndose".